बाल्यकालको दशैं नै रमाइलो: रमेश उप्रेती, नायक

नेपालीहरुको महान पर्व बडादशैंले देश अहिले रंगीचंगी भएको छ । परदेशमा हुने नेपालीहरु घर फर्किदै छन् भने राजधानी वा अन्य ठाउँमा बसेकाहरु पनि आफ्नो जन्मघर फर्किँदै गरेको भिड गज्जबकै देखिन्छ । 

 

नायक रमेश उप्रेतीको दशैं यस वर्ष गएका वर्षहरुभन्दा निकै विशेष छ । किनभने उनी अभिनित फिल्म 'ऐश्वर्य' कात्तिक ९ गतेबाट देशव्यापी प्रदर्शनमा आउँदैछ । हाल सम्पादन टेवुलमा रहेको फिल्मको कामसँगै दशैं मनाउने तयारीमा रमेश उप्रेती छन् । कसरी मनाउँदैछन् रमेश उप्रेतीले दशैं र कसरी सम्झन्छन् बाल्यकालमा मनाएको दशैं ? फिल्मीखबर डटकमले नायक रमेश उप्रेतीसँग गरेको दशैं विशेष कुराकानी तपाईमाझ पस्किएका छौ ।  

 

नायक रमेश उप्रेतीसँग गरिएको दशैं विशेष कुराकानी:

१. यस वर्षको दशैं कसरी मनाउने तयारीमा हुनुहुन्छ ? 

यस वर्षको दशैं मेरो निकै विशेष छ । कात्तिक ९ गतेबाट मैले निर्माण र अभिनय गरेको फिल्म 'ऐश्वर्य' हलमा लाग्दैछ । अहिले यही फिल्मको तयारीमा व्यस्त छु । यस वर्षको दश 'ऐश्वर्य'मय हुँदैछ । आफन्त र साथी-भाईसँग रमाइलो गरेर पनि दशैंलाई विशेष बनाउँदैछु ।  

 

२. दशैं कत्तिको विशेष लाग्छ तपाईलाई ? 

मलाई दशैंमात्र होइन हरेक चाड पर्वहरु विशेष लाग्छ । दशैंमा वर्ष दिनको तनावलाई भुलेर केही दिन भएपनि रमाउन पाइन्छ । आफन्त र साथी-भाईहरुसँग भेट्न पाइन्छ । दशैं भनेको यस्तो पर्व हो, जसले हरेक मानिसलाई खुशी बनाउँछ ।  

 

३. दशैंमा सम्झने बाल्यकालको कुनै एउटा घट्ना याद छ ?

त्यस्ता धेरै छन् । बाल्यकालको दशैं अहिलेको भन्दा पनि विशेष हुन्थ्यो । दशैंमा यस्तो लुगा लगाउने भनेर बुबा-आमासँग हाम्रो डिमाण्ड हुन्थ्यो । हरेक दिन जस्तो मासु खान पाइने, पिङ खेल्न पाइने, टिका लगाइसकेपछि आशिर्वादभन्दा पनि दक्षिणा निकै प्यारो हुन्थ्यो । पैसा पाउनकै लागि म धेरै आफन्तको घर जान्थें । यस्ता धेरै घट्नाहरु छन्, जसले बाल्यकालमा मनाएको दशैंको याद दिलाउँछ ।  

४. बाल्यकाल र अहिलेको दशैंमा कतिको फरक पाउनुहुन्छ ?

बाल्यकालमा जिम्मेवारी हुन्न थियो अहिले सबै जिम्मेवारी आफैमाथि हुन्छ । बाल्यकालमा सबै कुराहरु आमा-बुबाले गर्नुहुन्थ्यो अहिले सबै काम आफै गर्नुपर्छ । बाल्यकालमा डिमाण्ड मात्र गरिन्थ्यो अहिले परिवारको सम्पूर्ण डिमाण्ड आफूले पूरा गर्नु पर्छ । बाल्यकालको दशैं र अहिलेको दशैंमा धेरै फरक हुन्छ । 

 

५. मदिरा सेवन कत्तिको गर्नुहुन्छ दशैंमा ? 

मदिरा म खासै सेवन गर्दिन । मेरो शरीरले मदिरा पचाउँदैन । तर, मदिरा सेवन गर्दै नगर्ने भन्ने चाहिँ होइन तर मलाई खासै मन पर्दैन । यस वर्षको दशैंमा सायद मदिरामा रमाइन्न होला । 

 

६. दशैंमा तास चाहिँ कति प्रिय हुन्छ तपाईलाई ? 

दशैं र तिहारमा म तास चाहिँ खुब खेल्छु । मलाई साथी-भाईहरुसँग तास खेल्न मन पर्छ । यस वर्षको दशैंमा पनि साथी-भाईहरुसँग बसेर केही घण्टा रमाइलोका लागि तास खेल्ने सोच बनाएको छु । दशैंमा भन्दा पनि तिहारमा मलाई तास खेल्न मन पर्छ । 

 

७. केही वर्ष अगाडिसम्म अमेरिकामा दशैं मनाइरहनु भएको थियो । अहिले नेपालमा मनाउँदै हुनुहुन्छ । देश अनुसार दशैं मनाउने शैली पनि फरक फरक हुन्छ ? 

धेरै फरक हुन्छ । आफ्नो देशमा दशैंको छुट्टै माहोल हुन्छ तर अमेरिकामा त्यस्तो हुँदैन । विदेशमा त गज्जबले रमाइलो गरेर दशैं मनाएपनि नेपालको खुब याद आउँछ । अमेरिकामा भनेको मात्र काम-काम हुन्छ । दशैंमा अमेरिकामा विदा हुँदैन । काम सकेर आयो अनि साँझ दशैं मनायो । तर, नेपालमा दशैंको बेला छुट्दै रमाइलो हुन्छ । 

 

८. दशैंका लागि सपिङ गरिसक्नु भयो ? 

दशैंका लागि भनेर म सपिङ खासै गर्दिन । आफ्नो र परिवारका लागि आवश्यक परेको कुरा तत्काल गएर किनिहाल्छु । नत्र, दशैंका लागि भनेर छुट्टै सपिङ भने गर्दिन । बाल्यकालमा भने खुब सपिङ गरिन्थ्यो । 

 

९. दशैंको कुन पक्षले तपाईलाई आकर्षित गर्छ ? 

पहिलो त मौसम नै हो । मौसमका कारण पनि दशैं रमाइलो हुने गर्छ । अर्को भनेको आफूभन्दा ठूलाको हातबाट टिका लगाउँदै आशिर्वाद लिने नै हो । 

 

१०. दशैंमा माता दुर्गासँग देशका लागि के माग्दै हुनुहुन्छ ? 

म सधै भगवानसँग देशका लागि नै माग्छु । यो वर्षको दशैंमा पनि माता दुर्गासँग देशका विकास होस्, जनताले सुख पाउन, देश चलाउने राजनीतिज्ञहरुमा सतवुद्धि आओस् भन्ने कामना गर्छु ।